IATA COVID-19 кезеңінде әуе саяхатшыларына арналған интерактивті карта әзірледі

Салынған уақыты 30.06.2020 09:21

Халықаралық әуе көлігі қауымдастығы (IATA) авиажолаушыларға арналған әлемнің интерактивті картасын жасады. Ол коронавирустық инфекцияның пандемиясына байланысты қандай да бір мемлекеттің енгізген барлық шектеулері туралы ақпаратты қамтиды. Бұл туралы IATA баспасөз қызметі хабарлады.

Интерактивті сервис елді таңдап, онда саяхатшылар үшін қандай карантиндік шаралар қарастырылған, келген кезде тестілеу немесе қандай да бір қосымша құжаттама қажет пе екенін білуге мүмкіндік береді. Сонымен қатар, картада барлық мемлекеттердің шекаралардан өтуге қойылатын қолданыстағы талаптар негізінде, мәселен сапарлар толық шектелген, ішінара шектелген, шектелмеген немесе талаптар қазіргі уақытта қаралуда деген сияқты белгілі бір түстік коды бар.

Хабарланғандай, жаңа жоба авиакомпаниялардан, үкіметтік мекемелерден алынған авиатасымалдар туралы үнемі жаңартылып отыратын толық деректер ұсынылған ақпаратты қамтиды. Сонымен қатар, IATA баспасөз қызметі барлық туристерге сапар алдында картаны ғана қарап қоймай, өзекті ақпаратқа қол жеткізу үшін ұшу жоспарланып отырған елдің мемлекеттік ведомстволарының негізгі веб-сайттарына да кіруге кеңес береді.

1543