Жамбыл облысында іздестіру-құтқару операциялары бойынша оқу-жаттығулар өтті

Салынған уақыты 12.07.2024 14:30

Қазақстанда іздестіру-құтқару операцияларын ұйымдастыру және өткізу бойынша үйлестіру оқу-жаттығулары сәтті аяқталды. Оқу-жаттығуды бақылау Қазақстанның авиациялық әкімшілігінің өкілдері мен «Қазаэронавигация» РМК мамандарына жүктелді. Іс-шара Қазақстан Республикасы Төтенше жағдайлар министрлігінің қолдауымен ұйымдастырылды.

Жамбыл облысында өткен оқу-жаттығуға әуе кемелерін іздестіру-құтқару ауданында BO-105 типті тікұшақтармен кезекшілік жүргізетін «DALA AIR» ЖШС құтқарушыларының экипажы, «Қазаэронавигация» РМК-ның Іздестіру мен құтқаруды үйлестіру орталығы, Жамбыл филиалының әуе қозғалысына қызмет көрсету қызметі, Тараз қаласы, Мойымқұм ауданы және Жамбыл облысының Төтенше жағдайлар департаменті жедел құтқару отрядтарының күштері, сондай-ақ «Луговое» трассалық медициналық құтқару пункті қатысты.

Оқу-жаттығу барысында мамандар іздестіру-құтқару операцияларын өткізу кезінде қызметтер арасындағы өзара іс-қимыл әдістемесін, апатқа ұшыраған әуе кемесін іздестіру әдістерін пысықтады. Сондай-ақ іздестіру-құтқару әуе кемелерін таңдалған алаңға қондыру және зардап шеккендерді оқиға орнынан эвакуациялау тәсілдері қаралды.

Бүгінгі таңда Іздестіру мен құтқаруды үйлестіру орталығы Қазаэронавигацияда орналасқан. Орталық Қазақстан аумағында апатқа ұшырау жағдайындағы немесе ұшыраған әуе кемелерін іздестіру-құтқару жұмыстарын жүргізу кезінде тартылатын қызметтердің күштері мен құралдарын жедел ұйымдастыруды қамтамасыз етеді. Бүкіл ел бойынша күн сайын өз міндетін атқару үшін айналмалы қанатты машинаның 27 экипажы кезекшілікке түседі.

510