Қазаэронавигация авиадиспетчерлерінің қатары жаңа мамандармен толықты

Салынған уақыты 06.05.2024 12:47

«Қазаэронавигация» РМК Кәсіби дайындау орталығында әуе қозғалысына  қызмет көрсету (ӘҚҚ) диспетчерлерін бастапқы даярлау тобы оқуды аяқтады.

10 білім алушы ӘҚҚ диспетчерлерін кәсіби даярлауды сәтті аяқтағаны туралы куәлік алды. Бұл Кәсіби дайындау орталығы (КДО) құрылған күннен бергі 26-шы бітірушілер тобы. Нұсқаушылардың айтуынша, топ жоғары нәтиже көрсетті, пәндер бойынша орташа көрсеткіш ең жоғары 5 баллдың 4,5-інен төмен болмады, ал жаттығу құрылғысында қорытынды жаттығуда түлектер өздерін жақсы көрсетті.

Бір жыл ішінде білім алушылар теориялық, практикалық және жаттығу құрылғысында даярлау бөлігін сәтті меңгеріп шықты. Теориялық даярлық 13 модуль бойынша жүргізілгенін атап өту қажет. Сонымен қатар, болашақ авиадиспетчерлер ИКАО шкаласы бойынша ағылшын тілінің  4 жұмыс деңгейін меңгерді, ал 5-ші деңгейге қол жеткізген жалғыз түлек Айшат Дүйсенбай болды. Қазақстанның әуе кеңістігінде халықаралық ұшуларға қызмет көрсету үшін ағылшын тілін білу міндетті болып табылады.

Оқуды аяқтағаны туралы куәліктерді салтанатты табыстау жиынында Кәсіби дайындау орталығының директоры Жанот Уртембаева құттықтау сөз сөйлеп, түлектерге әуе қозғалысына мінсіз қызмет көрсетіп, алдағы жұмыстарында сәттілік тіледі.

Жақын арада КДО түлектері Қазақстанның барлық өңірлеріне жұмысқа жіберіледі. Олардың кейбіреуі республикалық маңызы бар қалаларда жұмыс істейтін болады. Онда олар тәжірибелі нұсқаушылардың жетекшілігімен тағылымдамадан өтіп, кейіннен дербес жұмысқа жіберіледі.

963